Trivnaðardepilin

Trivnaðardepilin veitir tænastur til teirra, sum hava tørv á vegleiðing, stuðli ella hjálp í gerandisdegnum. Virksemið í Trivnaðardeplinum er skipað í 6 eindir, sum eru býttar upp eftir breki og í nøkrum førum eftir landafrøði.

Arbeiðshátturin tekur støði í KRAP, sum inniheldur sosialnámsfrøðilig- og sálarfrøðilig háttaløg. Arbeitt verður tilvitað og viðurkennandi. KRAP umfatar eina røð av ítøkiligum amboðum, sum stuðla dagliga arbeiðinum. Hesi eru býtt upp í greining, fatan, yvirlit, menning, broyting og “meistringsstrategiir” hjá tí einstaka.

Endamálið er at starvsfólkini stuðla, vegleiða, leggja virkisætlan og viðgerð tilrættis, við støði í avbjóðingum hjá tí einstaka. Háttalagið og menniskjafatanin handan KRAP- amboðini er, at sjóneykan verður sett á at menna tilfeingið hjá einstaka borgaranum, soleiðis at øll fáa gagnnýtt og ment egnar førleikar. Gjøgnum miðvíst arbeiði virka starvsfólkini fyri, at allir borgarar fáa ábyrgd av og ávirkan á egið lív.

KRAP er bæði ein menniskjafatan og ein arbeiðsháttur, sum verður nýttur innan menningartarn, kognitivar avbjóðingar, ADHD, autismu, atferðartrupulleikar, umsorganarsvík, sjálvskaðandi atburð, kompleksar sálarligar sjúkur og psykososialar avbjóðingar.

KRAP merkir á donskum: Kognitiv, Ressourcefokuseret og Anerkendende Pædagogik.

Trivnaðardepilin veitir tænastur sambært almannalógini og barnaverndarlógini.

Asta Marjunardóttir er depilsstjóri í Trivnaðardeplinum