Lønarendurgjald til smærri privatar arbeiðsgevarar fyri langtíðarsjúk starvsfólk

1. januar 2026 er nýggj broyting komin við í sjúkradagpeningalógina.

Við nýggju broytingini, fáa smærri privatir arbeiðsgevarar møguleika at fáa endurgoldið ein part av lønarútreiðslunum, tá starvsmaðurin hevur verið sjúkur í meira enn fýra vikur. Fyrstu fýra vikurnar rindar arbeiðsgevarin sjálvur.

Endurgjaldið fylgir somu reglum sum aðrar dagpeningaveitingar og kann vera upp til 80% av eini arbeiðaraløn sambært sáttmálanum millum Føroya Abeiðsgevarafelag og Føroya Arbeiðarafelag.

Hvør kann fáa endurgjald?

Skipanin er ætlað smærri vinnurekandi, t.v.s. fyritøkum, sum:

• hava samlaðar lønarútreiðslur upp til 4 mió. kr. sambært síðsta álíknaða inntøkuári
• hava starvsfólk sett sambært starvsmannalógini
• eru privatir arbeiðsgevarar

Endamálið við lógaruppskotinum er at fyribyrgja støður, har smærri vinnurekandi koma í fíggjarligt óføri, tí ein starvsmaður hjá fyritøkuni verður langtíðarsjúkur. Tað meira yvirskipaða endamálið er at geva smærri vinnurekandi í Føroyum betri treytir at virka og menna seg undir.

Umsóknarblað við kunning um treytir og skjalprógv finst her.